प्यार का नशा पूरा नहीं पड़ता तन्नै / नवीन रमण

Gadya Kosh से
यहाँ जाएँ: भ्रमण, खोज

बबलू और प्रियंका

बबलू

आज तेरे मुंह मैं कै घणी भूंडी बांस (बदबू) आवै थी बीड़ी की। कम तै कम जब मेरे तै मिलण आवै तै बीड़ी तो मत पी कै आया कर। इस बीड़ी तै बढ़िया तो मेरा बाबू होक्का (हुक्का) बताया करै। ओए पी लिया कर। यै बीड़ी तै दांत बी पीले कर दे सै।

अर मन्नै तै इसा बी लागण लाग लिया सै अक तू दारू बी पीवै सै। जबे तेरा पेट बढन लाग रह्या सै। क्यूं तू नास की राहिया चालण लाग रह्या सै।

मान ज्या यार। तन्नै मेरी कसम सै। जै तू मेरे तै साच्चा प्यार करता होगा तो दोनूं चीज छोड़ देगा।

आई लव यू

तेरी प्रियंका ————————————————

हाँ डार्लिंग प्रियंका

ऊँ तै तू ठीक कहवै सै। मन्नै बी महसूस होवै सै अक तन्नै साच्ची मैं घणी भूंडी बांस आंदी होगी। अर मन्नै बी दिखै सै। अक दांत बी कती पीले के कती सड़ लिए सै। अर दारू की बी के बताऊ। तन्नै बेरा सै इब मन्नै 20-21 दिन होगे छोड़ राखी थी। पर के करूँ मेरा बी दोस्ता गेल पीण नै जी कर ज्या सै। एकाध सै जिनके गेल पिए बिना मजा नी आंदा। पर कती तो ना छुटै पर कोशिश करूँगा एकाध पै पी लिया करूंगा।

तन्नै बी कसम सै घणी नी कहवैगी। तू बी तै कसम पै कसम खवां कै कती लत्ते से तार दे सै। थोड़ा बहोत तू सोच लिया कर यार।

दांत तो डॉक्टर पै कती धोले करवा ल्यूंगा।

आई लव यू प्रियंका।

तेरा बबलू